Япон улсад болж буй “Aichi Nagoya 2026” Азийн XX наадмын 3х3 сагсан бөмбөгийн тэмцээнд Монголын эрэгтэй шигшээ баг хэсгийн сүүлийн тоглолтоо хийж, Шри-Ланкийн багийг 21-11 харьцаатайгаар хожлоо.

Монголын шигшээ баг хэсгийн тоглолтоо хоёр хожил, нэг хожигдолтой өндөрлүүлэв. A хэсгийн эхний тоглолтдоо Филиппинд 12-19-өөр хожигдсон бол дараагийн тоглолтод Казахстаныг 13-8-аар буулган авсан.

Казахстаны эсрэг тоглолтод Монголын баг хамгаалалтаа сайн зохион байгуулж, өрсөлдөгчөө 8 оноонд барьсан нь тоглолтын чухал үзүүлэлт байлаа. Харин Филиппиний эсрэг тоглолтын үр дүнгээс харахад илүү хүчтэй өрсөлдөгчдийн эсрэг тоглолтын хэмнэлээ хадгалж, довтолгооны үр дүнгээ тогтвортой байлгах нь анхаарах асуудлын нэг болж байна.

OCA-гийн ярилцлагад шигшээ багийн гишүүн С.Биндэръяа хамгаалалтад анхаарч, тоглолтын хэмнэлээ тайван атлаа хурдан байлгах шаардлагатайг онцолж байв. Үүний дараа Монголын баг Казахстаныг 13-8-аар хожсон нь хамгаалалтын зохион байгуулалтаа сайжруулж чадсаныг харуулсан юм.

Монголын эрэгтэй шигшээ багийн бүрэлдэхүүнд “Хасын Хүлэгүүд” багийн Ч.Тэмүүлэн, С.Биндэръяа, “Эрдэнэт Майнерс” багийн Г.Болор-Эрдэнэ болон Г.Балжинням нар багтсан бөгөөд Канадын дасгалжуулагч Стив Сир удирдан ажиллаж байна.

Энэ жилийн Азийн наадамд 3x3 сагсан бөмбөгийн эрэгтэй төрөлд нийт 16 улсын баг дөрвөн хэсэгт хуваагдан өрсөлдөж байгаа юм. Монголын багийн хэсгээ тэргүүлж, цааш шалгарах эсэх нь Филиппин болон Казахстаны шигшээ багуудын тоглолтын үр дүнгээс шалтгаална.

Эх сурвалж: ABS