ОХУ-ын газрын тос боловсруулах үйлдвэрүүдээс нийлүүлэх шатахууны тээвэрлэлт төмөр замын засварын ажил, вагон эргэлтийн удаашралаас шалтгаалан саатаад байсан юм. Харин сүүлийн өдрүүдэд тээвэрлэлт нэмэгдэж, Улаанбаатар төмөр замд ирсэн АИ-92 бензин ачсан 153 вагон буюу 9,108 тонн бүтээгдэхүүнээс 126 вагон буюу 7,500 тонныг буулгаж, түгээх ажил үргэлжилж байна.

Өнгөрсөн амралтын өдрүүдэд нийслэлийн ШТС-уудаар 1,200 тонн, орон нутгийн ШТС-уудаар 1,300 орчим тонн АИ-92 бензин борлуулжээ.

Улсын хэмжээнд АИ-92 автобензиний 24 мянган тонн, дизель түлшний 120 мянган тонн, онгоцны түлшний 7,700 тонн буюу тус бүр 11, 30, 37 хоногийн нөөцтэй байна. Энэ нь арваннэгдүгээр сарын 3-ны үзүүлэлттэй харьцуулахад АИ-92 бензиний нөөц нэг, дизель түлшнийх хоёр хоногоор нэмэгдсэн үзүүлэлт юм.

Нийлүүлэлтийг тогтворжуулах зорилгоор энэ сард 92 мянган тонн шатахуун импортлохоор захиалга баталгаажуулсан талаар Аж үйлдвэр, эрдэс баялгийн яам мэдээлсэн. Мөн импортын шатахууныг шуурхай буулгаж, түгээлтэд шилжүүлэхийн зэрэгцээ дотоодын хадгалах хүчин чадлыг нэмэгдүүлэхээр ажиллаж байна гэв.