Эрэгтэйчүүдийн ангилалд “Төв Миг Вулвс”, “Алтайн барс Хилчин”, “Дархан Могулс”, “Хасу Мегастарс”, “Эс Жи Хокс”, “Натур Бакс”, “Говь Мазаалай”, “Минтонетт Говь” багууд оролцоно. Харин эмэгтэйчүүдийн ангилалд “Минтонетт Говь”, “Хобби Эйс”, “Хөвсгөл 7 од”, “Хилчин”, “Хашхан Өвөрхангай”, “Дархан Могулс”, “Уурхайчин”, “Неосити Финикс” багууд өрсөлдөхөөр бүртгүүлжээ.

Энэ улирлын онцлох үйл явдлын нэг нь багуудын бүрэлдэхүүний өөрчлөлт, тоглогчдын шилжилт хөдөлгөөн юм. Clutch Sports Mongolia-ийн танилцуулгад “Натур Бакс” багаас Э.Энх-Амгалан “Эс Жи Хокс”, Б.Амар “Дархан Могулс”, Б.Наранбаяр “Хасу Мегастарс” багт шилжсэн талаар мэдээлсэн байна. Мөн өнгөрсөн улиралд бэртлийн улмаас тоглоогүй С.Нямсүх “Хасу Мегастарс” багийн бүрэлдэхүүнд эргэн тоглохоор болсон тухай мэдээлэл байгаа юм. Түүнчлэн БНСУ-ын мэргэжлийн волейболын лигт тоглож байсан, олон улсын хэмжээний мастер Б.Баярсайхан тус багт тоглох тухай мэдээлэл гарсан нь шинэ улирлын анхаарал татах үйл явдлын нэг болж байна. Өнгөрсөн 2025–2026 оны улиралд эрэгтэйчүүдийн ангилалд “Төв Миг Вулвс” баг анх удаа аваргын цом хүртэж, “Алтайн барс Хилчин” дэд байр, “Дархан Могулс” гуравдугаар байрт шалгарсан. Иймээс аваргын цомоо хамгаалах “Төв Миг Вулвс” болон бүрэлдэхүүнээ шинэчилж буй бусад багийн өрсөлдөөн энэ улирлын гол сонирхол татах үйл явдлуудын нэг байх төлөвтэй байна.

Монголын волейболын Үндэсний дээд лиг анх 1995 онд зохион байгуулагдсан түүхтэй. Улмаар 2012 оноос тэмцээн Волейболын холбооны цомын төлөөх тэмцээний хэлбэрт шилжиж, 2019 онд Үндэсний дээд лигийн нэрээр дахин сэргээн зохион байгуулагджээ. Тухайн жилийн тэмцээнд эрэгтэй долоо, эмэгтэй зургаан баг оролцож байсан бол өнөөдөр нийт 16 баг өрсөлдөх хэмжээнд хүрсэн байна. Үндэсний дээд лиг нь өнгөрсөн хугацаанд Монголын волейболын клубүүдийн өрсөлдөөнийг хөгжүүлж, олон улсын тэмцээнд оролцох тамирчдын ур чадварыг ахиулах, шинэ залуу тоглогчдыг тодруулах чухал талбар болж иржээ.

Үзэгчид Үндэсний дээд лигийн тоглолтын хуваарьтай танилцаж, тасалбараа Talon.mn цахим платформоор дамжуулан худалдан авах боломжтой.

📍 Арваннэгдүгээр сарын 6–8-ны тоглолтууд: М Банк Арена

🎟️ Тасалбар: Talon.mn