Наадмын нээлтийн кино нь Оскарын шагналт найруулагч Дэнни Бойлын “Ink” бүтээл байлаа. Тус кино нь 1969 онд Руперт Мёрдок Их Британийн The Sun сониныг худалдан авч, уламжлалт хэвлэл мэдээллийн салбарт хэрхэн томоохон өөрчлөлт авчирсан түүхийг өгүүлдэг. Гол дүрд Гай Пирс, Жэк О’Коннелл нар тоглосон бөгөөд уг бүтээл Алтан арслан шагналын төлөө өрсөлдөж байна.

Энэ жилийн үндсэн уралдаанд 21 кино Алтан арслангийн төлөө өрсөлдөж байгаа бөгөөд шүүгчдийн бүрэлдэхүүнийг жүжигчин, найруулагч Мэгги Жилленхол ахалж байна.

Нээлтийн ёслолын үеэр Холливудын нэрт жүжигчин, найруулагч Жорж Клунид кино урлагт оруулсан хувь нэмрийг нь үнэлж Насан туршийн амжилтын Алтан арслан шагналыг гардуулжээ. Шагналыг жүжигчин Лаура Дерн гардуулсан байна.

Клуни шагналаа гардан авах үеэр уран бүтээлчид айдас, дарангуйлал, нийгмийн асуудлын талаар дуу хоолойгоо хүргэх ёстойг онцолсон байна. Энэ жилийн наадмын хүрээнд улс төр, дайн мөргөлдөөн, хиймэл оюун ухаан, хэвлэлийн эрх чөлөө зэрэг сэдэвтэй бүтээлүүд олноороо багтсан нь анхаарал татаж байна.

Мөн наадмын шүүгчдийн бүрэлдэхүүнийг ахалж буй Мэгги Жилленхол кино урлагийн салбар дахь жендэрийн тэгш бус байдлыг хөндөж, эмэгтэй найруулагчдын бүтээл санхүүжилт авахад хүндрэлтэй хэвээр байгааг шүүмжилжээ.

Ийнхүү Венецийн кино наадам 11 хоногийн турш дэлхийн кино урлагийн шилдэг бүтээлүүдийг танилцуулж, Алтан арслан зэрэг гол шагналуудын эздийг тодруулах бөгөөд хаалтын ёслол есдүгээр сарын 12-нд болно.

Эх сурвалж: Reuters