Их Британийн технологийн компани Wayve болон Uber хамтран Лондон хотод жолоочгүй зорчигч тээврийн үйлчилгээг эхлүүлсэн байна. Энэ нь Их Британид Uber платформ дээрх анхны бүрэн автономит зорчигч тээврийн үйлчилгээ болжээ.

Шинэ үйлчилгээнд хиймэл оюун ухаанд суурилсан жолоодлогын систем ашиглаж, автомашин замын хөдөлгөөн, орчны нөхцөл болон бусад тээврийн хэрэгслийн хөдөлгөөнийг өөрөө тооцоолон жолоодох юм.

Wayve компанийн технологи нь хиймэл оюун ухааны тусламжтайгаар замын нөхцөлд суралцаж, хүний жолоочийн оролцоог багасгах зорилготой. Харин Uber нь автономит тээврийн технологийг өөрийн дэлхийн үйлчилгээний сүлжээнд нэвтрүүлэх стратегийн хүрээнд энэхүү төслийг хэрэгжүүлж байна.

Лондон хотод эхэлсэн туршилт нь Европын томоохон хотуудад жолоочгүй такси үйлчилгээг нэвтрүүлэх өрсөлдөөнийг эрчимжүүлэх төлөвтэй байна.

Автономит тээврийн технологи хөгжихийн хэрээр замын хөдөлгөөний аюулгүй байдал, хүний жолоочийн ажлын байр, хиймэл оюун ухааны хариуцлага зэрэг асуудал мөн зэрэгцэн яригдаж байна.

Эх сурвалж: Reuters