S&P-ийн тооцоолсноор Оюу Толгойн хоёрдугаар шатны үйлдвэрлэл нэмэгдэж, нүүрсний экспорт тогтвортой үргэлжилснээр уул уурхайн салбар ойрын жилүүдэд Монголын эдийн засгийн өсөлтөд дэмжлэг болох төлөвтэй байна. Мөн тус агентлагийн ашигладаг гадаад өрийн үзүүлэлт болох гадаад цэвэр өрийг урсгал дансны орлогод харьцуулсан харьцаа 2020 онд 183.8 хувь байсан бол 2026 онд 58.3 хувь болж буурах төлөвтэй гэж тооцжээ. Монголын эдийн засгийн бодит өсөлт ирэх 2–3 жилд ижил орлогын түвшинтэй орнуудынхаас харьцангуй өндөр байх хүлээлттэй байна.

Засгийн газрын санхүүгийн үзүүлэлт ч үнэлгээнд эерэгээр нөлөөлжээ. S&P-ийн тооцоогоор Засгийн газрын цэвэр өр 2025 онд ДНБ-ий 29 орчим хувьтай тэнцэхүйц байсан бол 2026-2029 онд 25 орчим хувьд хүрэх төлөвтэй байна. Мөн Засгийн газрын хүүгийн төлбөр төсвийн орлогын 3.6 хувьтай тэнцэж байгаа бөгөөд цаашид 5 хувиас доогуур түвшинд хадгалагдана гэж үзжээ. Үүнээс гадна төсвийн тэнцвэржүүлсэн алдагдлыг ДНБ-ий 2 хувиас хэтрүүлэхгүй байх бодлого хэрэгжүүлж, Төсвийн тогтворжуулалтын сан болон баялгийн санд хуримтлал бүрдүүлж байгаа нь төсвийн сахилга батыг хадгалахад дэмжлэг болж байна гэж S&P дүгнэсэн байна. Засгийн газрын мэдээлснээр эдгээр хуримтлалыг тооцсон нэгдсэн төсвийн тэнцэл 2026 онд ДНБ-ий 2.0 хувь, 2027 онд 1.6 хувийн ашигтай гарах төлөвтэй байна.

Ингэснээр 2026 онд Монгол Улсын зээлжих зэрэглэлийг олон улсын гурван том агентлаг бүгд “тогтвортой” төлөвтэй хэвээр үнэлээд байна. Fitch Ratings Наймдугаар сарын 19-нд Монгол Улсын үнэлгээг “B+, тогтвортой”, Moody’s Investors Service Аравдугаар сарын 5-нд “B1, тогтвортой” гэсэн үнэлгээг өгөөд байсан бол S&P Global Ratings “BB-, тогтвортой” хэвээр гэсэн үнэлгээг өгсөн юм.

S&P Global Ratings-ийн “тогтвортой” төлөв нь ойрын хугацаанд Монгол Улсын зээлжих зэрэглэлд огцом өөрчлөлт гарах хүлээлт бага байгааг илэрхийлж байгаа ч Монголын эдийн засаг уул уурхайн экспорт, түүхий эдийн үнэ болон гадаад зах зээлийн өөрчлөлтөд мэдрэмтгий хэвээр байгааг тайландаа онцолжээ. Түүнчлэн “BB-” үнэлгээ нь хөрөнгө оруулалтын зэрэглэлээс доогуур ангилалд багтдаг.

Гэсэн ч Монгол Улсын зээлжих зэрэглэл сүүлийн хоёр жилд шат дараатай сайжирсан. S&P Монгол Улсын урт хугацааны үнэлгээг 2024 оны Аравдугаар сард “B”-ээс “B+”, 2025 оны Аравдугаар сард “B+”-ээс “BB-” болгон тус тус ахиулсан бөгөөд 2026 онд энэ түвшин хэвээр хадгалагдлаа. S&P-ийн мэдээлснээр Монгол Улс 2025 онд 25 жилийн дараа анх удаа “B” ангиллаас “BB” ангилалд шилжсэн бөгөөд үүнд өрийн үзүүлэлт сайжирч, төсвийн ашиг нэмэгдсэн нь голлон нөлөөлсөн юм.

Эх сурвалж: Монгол Улсын Засгийн газар, S&P Global Ratings