Тэгвэл өнөөдөр буюу Аравдугаар сарын 6-нд паркийн амфитеатрт зохион байгуулах “Улаанбаатарын үдэш” арга хэмжээний үеэр менежментийг албан ёсоор хүлээлгэн өгөхөөр мэдээлжээ. Энэхүү цэцэрлэгт хүрээлэнгийн төсөл 2022 онд эхэлсэн.

Тухайн үед “Рио Тинто Монгол”, Нийслэлийн Засаг даргын Тамгын газар болон “Үндэсний соёл амралтын хүрээлэн” ХХК хамтын ажиллагааны санамж бичиг байгуулж, Хүүхдийн паркийн баруун хэсгийн 10 орчим га талбайг нийтийн зориулалттай ногоон орон зай болгон тохижуулахаар тохиролцсон. Улмаар 10.2 га талбайг тохижуулахдаа нийслэлийн 10 мянга гаруй иргэний саналыг зураг төсөлд тусгаж, задгай театр, хүүхдийн тоглоомын талбай, цөөрөм, усалгааны систем зэрэг байгууламжийг шийджээ. Мөн 40 мянга гаруй мод, бут тарьж, нийт талбайн 80 орчим хувийг ногоон байгууламж болгон тохижуулсан байна.

Парк ашиглалтад орсноосоо хоёр сарын дараа олон улсын Green Flag Award-ийн шалгуурыг хангаж, уг шагналыг хүртсэн. Green Flag Award-ийн албан ёсны мэдээлэлд Улаанбаатарын цэцэрлэгт хүрээлэнг 2022 оноос хотын захиргаатай хамтран шинэчилж, 2024 оны Долоодугаар сарын 3-нд нээсэн гэж тэмдэглэжээ.

Тус үнэлгээгээр цэцэрлэгт хүрээлэнгийн тохижилтоос гадна орчны цэвэр, аюулгүй байдал, тогтвортой менежмент, байгаль орчны зохистой удирдлага болон олон нийтэд хүртээмжтэй байдлыг шалгадаг. Ийнхүү “Рио Тинто Монгол” төслийн бүтээн байгуулалтыг хэрэгжүүлээд зогсохгүй ашиглалтад орсноос хойших эхний хоёр жилийн менежментийг хариуцсаны дараа анх төлөвлөсний дагуу хотын захиргаанд шилжүүлж байна. Цаашид паркийн ногоон байгууламж, усалгааны систем, нийтийн эзэмшлийн тохижилт болон олон улсын стандартад нийцсэн менежментийг хэвээр хадгалах асуудал Улаанбаатар хотын захиргааны хариуцах ажил болох юм.

Эх сурвалж: “Рио Тинто Монгол” ХХК, Green Flag Award.