Жирэмсэн үед эхийн бие болон ургийн өсөлт, хөгжилд шаардлагатай аминдэм, эрдсийн хэрэгцээ нэмэгддэг. ОНБТБ нь 10 төрлийн аминдэм буюу А, Д, Е, С, В₁, В₂, В₃, В₆, В₁₂ аминдэм болон фолийн хүчил; 5 төрлийн эрдэс буюу төмөр, цайр, зэс, селен, иод агуулдаг. Эдгээр аминдэм, эрдэсүүд нь жирэмсэн эхийн болон ургийн эрүүл өсөлт, хөгжилд нэн шаардлагатай бөгөөд гарч болох олон эрсдэлээс сэргийлдэг. Жишээ нь: төмөр нь гемоглобин үүсэхэд оролцдог тул төмөр дутлын цус багадалтаас сэргийлэхэд чухал. Фолийн хүчил ургийн тархи, нугасны эхлэл болох мэдрэлийн гуурс бүрэлдэхэд, иод бамбай булчирхайн даавар үүсэх болон ургийн тархи, мэдрэлийн тогтолцоо хөгжихөд хэрэгтэй. Бэлдмэлийг зохистой хэрэглэх нь эдгээр бичил тэжээлийн хэрэгцээг хангаж, дутагдлын эрсдэлийг бууруулахад дэмжлэг үзүүлнэ.

“Жирэмсний үеийн эрүүл хооллолт — хоол тэжээлийн зөвлөгөө” товхимолд жирэмсний хяналтад орсон үеэс төрөх хүртлээ өдөр бүр нэг шахмалаар тогтмол хэрэглэхийг зөвлөжээ. Бэлдмэлийг хооллох үеэр эсвэл хоолны дараа ус, жимсний шүүсээр даруулж, зажилалгүй залгина. ОНБТБ нь хоолыг орлохгүй тул олон төрлийн тэжээллэг хүнс хэрэглэх шаардлагатай.

Товхимолд бэлдмэлийг сүү, цагаан идээтэй хамт хэрэглэхгүй байхыг зөвлөсөн. Учир нь тэдгээрт агуулагдах кальци төмрийн шимэгдэлтийг саатуулж болзошгүй. Мөн бүх төрлийн цайг ОНБТБ-тэй хамт уухгүй байхыг зөвлөжээ: цайнд агуулагдах танин төмрийн шимэгдэлтийг бууруулдаг. Цай, кофе, какао, коланы хэрэглээг багасгахыг ч товхимолд дурдсан байна. Уухаа мартсан бол дараагийн өдөр давхарлаж уухгүй, эмч, эх баригчийн зааврыг дагаарай.

Эх сурвалж: Жирэмсний үеийн эрүүл хооллолт — хоол тэжээлийн зөвлөгөө, 2026; НҮБ-ын Хүүхдийн сан.