Шведийн академи жил бүр утга зохиолын салбарт ойролцоогоор 300 санал хүлээн авч, хавар нэрсийн жагсаалтыг 20 орчим болгон цөөлсний дараа зуны өмнө тав орчим зохиолчийн богино жагсаалт гаргадаг. Гэхдээ нэр дэвшигчдийн мэдээллийг 50 жилийн турш нууцалдаг тул албан ёсны нэр дэвшигчдийн нэрсийг олон нийтэд ил болгодоггүй байна. Харин “The Guardian” сэтгүүл Аравдугаар сарын 7-ны мэдээлэлдээ Канадын яруу найрагч Энн Карсон, Хятад зохиолч Цань Сюэгээр эхлүүлсэн Японы зохиолч Харүки Мүраками, Австралийн зохиолч Жералд Мёрнейн, Америкийн зохиолч Томас Пинчон, Канадын зохиолч Маргарет Этвүүд нарын нэрсийг жагсаажээ. Гэхдээ эдгээр нэрс Шведийн академийн албан ёсны нэр дэвшигчид бус, хэвлэлийн таамаг гэдгийг анхаарах нь зүйтэй.

Энн Карсон @letralia.com

Цань Сюэ @X

Associated Press агентлагийн мэдээлснээр утга зохиолын шагнал нь энэ жилийн Нобелийн долоо хоногийн үргэлжлэл болж байна. Үүний дараа Аравдугаар сарын 9-нд Нобелийн энх тайвны шагнал, Аравдугаар сарын 12-нд Альфред Нобелийн дурсгалд зориулсан эдийн засгийн шинжлэх ухааны шагналтнуудыг зарлана. Нобелийн шагналтнууд Альфред Нобелийн нас барсан өдөр буюу Арванхоёрдугаар сарын 10-нд болох ёслолоор шагналаа гардан авдаг.

Утга зохиолын шагналтныг сонгохдоо Шведийн академийн санал хураалтад тухайн нэр дэвшигч нийт саналын талаас илүү хувийг авснаар шалгарах бөгөөд энэ жилийн шагналын мөнгөн дүн болох 12 сая швед кроныг хүлээн авах юм. Өнгөрсөн жил уг шагналыг Унгарын зохиолч Ласло Краснахоркай хүртсэн.

Эх сурвалж: Шведийн академи, NobelPrize.org, Associated Press, The Guardian