Түүнд холбогдох хэрэг нь Нийслэлийн Засаг даргаар ажиллаж байх үеийн Нэгдүгээр тойрог замын төсөлтэй холбоотой тендерүүдтэй холбогдож байна. Тодруулбал, тухайн үед нийслэлийн Засаг даргын орлогчоор ажиллаж байсан Т.Даваадалай болон түүний эхнэр Б.Анхтуяатай холбоотой компаниуд нийслэлээс зарласан тендерүүдэд шалгарсан гэх асуудлыг хууль хяналтын байгууллага шалгаж байгаа юм.

20 тэрбумын тендерт ямар компани шалгарсан бэ?

Т.Даваадалай хөрөнгө, орлогын мэдүүлэгтээ “Авангард уран дизайн энд инженеринг” компанитай холбоотой мэдээлэл тусгасан байдаг. Тус компани Сүхбаатар дүүргийн нэгдүгээр хороо, “Бизнес тауэр”-ийн 504 тоот хаягт бүртгэлтэй байна. Уг компани “Шинэ тойрог зам” төслийн ТЭЗҮ боловсруулах 20 тэрбум төгрөгийн тендерт шалгарсан гэх мэдээлэл яригдаж байна.

Үүнээс гадна Нэгдүгээр тойрог замын зөвлөх үйлчилгээний 16 тэрбум төгрөгийн тендерт БНХАУ-ын “Си эс си и айком консалтантс” компани шалгарсан гэх мэдээлэл бий. Анхаарал татаж буй нэг зүйл нь дээрх хоёр компанийн бүртгэлтэй хаяг мөн адил “Бизнес тауэр”-ийн 504 тоот гэж дурдагдсан явдал. Ингэснээр нэг хаягт бүртгэлтэй гэх хоёр компанийн хооронд ямар нэгэн холбоо байсан эсэх, мөн тухайн компаниуд тендерт хэрхэн шалгарсан нь шалгалтын хүрээнд яригдаж байна.

Т.Даваадалайгийн эхнэртэй холбоотой асуудал ч хөндөгдөж байна

Мөн Т.Даваадалайгийн эхнэр Б.Анхтуяа БНХАУ-ын “Шинжлэх ухааны академи хотын хүрээлэн буй орчны судалгааны хүрээлэн”-д ажилладаг гэх мэдээлэл бий. Үүнтэй холбогдуулан тус байгууллагатай холбоотой гэх БНХАУ-ын компани нийслэлийн зөвлөх үйлчилгээний тендерт шалгарсан гэх асуудал мөн хөндөгдөж байна.

Өөрөөр хэлбэл, Нэгдүгээр тойрог замын төсөлтэй холбоотой хоёр тендерт шалгарсан компаниуд, тухайн үеийн нийслэлийн удирдлагууд болон тэдгээрийн хамаарал бүхий этгээдүүдийн хооронд холбоо байсан эсэхийг тогтоох шаардлагатай болж байна.

Энэ асуудал өмнө нь ч яригдаж байсан

Энэ нь Т.Даваадалайд холбогдох хэргийн хүрээнд өмнө нь яригдаж байсан асуудал юм. Түүнийг өөрийн хамаарал бүхий этгээд буюу эхнэр Б.Анхтуяагийн үүсгэн байгуулсан аж ахуйн нэгжээр дамжуулан 5.2 тэрбум төгрөгийн хахууль авсан гэх хэрэгт шалгаж, цагдан хорьсон талаар Наймдугаар сард мэдээлж байсан. Мөн “Шинэ тойрог авто зам” төслийн 16.9 тэрбум төгрөгийн урьдчилсан ТЭЗҮ болон зураг төсөл боловсруулах тендертэй холбоотойгоор ажлын даалгаврыг өөрчилсөн гэх асуудлыг шалгаж байгаа талаар мэдээлсэн. Харин Т.Даваадалай дөрөвдүгээр сард эхнэр нь улсаас 20 тэрбум төгрөгийн тендер авсан гэх мэдээллийг үгүйсгэж, уг мэдээлэлтэй холбоотойгоор шүүхэд хандахаа мэдэгдэж байсан юм. Ингээд харахад Нэгдүгээр тойрог замын төслийн хүрээнд зарлагдсан ТЭЗҮ болон зөвлөх үйлчилгээний тендерүүд, тэдгээрт шалгарсан компаниудын бүртгэл, эзэмшил болон тухайн үеийн нийслэлийн удирдлагуудтай холбоотой асуудал анхаарлын төвд байна. Харин эдгээр үйлдэлд хууль зөрчсөн эсэх, албан тушаалын давуу байдал ашигласан эсэхийг мөрдөн шалгах ажиллагаагаар тогтооно. Одоогоор Х.Нямбаатар болон бусад холбогдох этгээдүүдийн гэм бурууг шүүх эцэслэн тогтоогоогүй байна.