Тэрбээр өөрийг нь албан тушаалаас чөлөөлсөн асуудлыг зөвхөн сайдын суудлын тухай асуудал биш хэмээгээд, бусармаг үйл ажиллагаатай эвлэрээгүйн улмаас албан тушаалаас чөлөөлөгдсөн ч харамсах зүйлгүй гэдгээ хэлэв.

С.Амарсайхан Хууль зүй, дотоод хэргийн салбарт ажиллах хугацаандаа хар тамхи, хууль бус алт олборлолт болон төрийн байгууллагад хувийн ашиг сонирхлоо шингээдэг бүлэглэлүүдийн үйлдэлд анхаарч ажилласан гэж мэдээллээ.

Мөн хууль сахиулах байгууллагын зарим удирдлагатай холбоотой асуудлыг хөндөж, төрийн байгууллагын зарим хэсэг улс орны эрх ашгаас илүү явцуу ашиг сонирхолд үйлчилж байгаа гэх байр суурь илэрхийлсэн байна. Эдгээр нь С.Амарсайханы өөрийнх нь хийсэн мэдэгдэл бөгөөд холбогдох асуудлыг эрх бүхий байгууллагаар шалгаж, баримтаар тогтоох шаардлагатай юм.

Тэрбээр Монгол Улсын үндэсний болон дотоод аюулгүй байдалтай холбоотой олон асуудлаар олон нийтэд мэдээлэл хүргэж ирсэн гэдгээ хэлээд, “Өнөөдөр манай улсын дотоод аюулгүй байдал хутганы ирэн дээр байна” хэмээн мэдэгдэв. Мөн эдгээр асуудлыг УИХ, Засгийн газрын түвшинд хэлэлцэж, шаардлагатай тохиолдолд Тусгай хяналтын дэд хороо байгуулан сонсгол хийх замаар олон нийтэд ил болгох шаардлагатай гэж үзэж байгаагаа илэрхийллээ.

С.Амарсайхан цаашид ч өөрийн мэдэж байгаа асуудлуудын талаар мэдээлэхээ хэлж, “Цаашид ч улам чанга дуугарч, шүгэл үлээх болно. Дэлгэх мэдээлэл, дурдаагүй сэдэв олон бий” гэж мэдэгдсэн байна.

Түүнчлэн дараагийн Хууль зүй, дотоод хэргийн сайдад улс төр, бусад хүрээнээс дарамт, шахалт ирж болзошгүйг анхааруулсан байна. Тэрбээр дараагийн сайдыг янз бүрийн нөлөөлөлд оруулах, гаргасан шийдвэрийг нь буцаалгахыг оролдох зэрэг асуудал гарч болзошгүй тул үүнээс ухарч болохгүй гэж зөвлөсөн гэв.

С.Амарсайхан “албан тушаалаас нь чөлөөлж болох ч өөрийн үзэл бодол, үнэт зүйл болон олж харсан баримт нотолгооноос нь хөндийрүүлж чадахгүй” гэлээ.