Тэрбээр “Зэс-Оюу” нь цахилгаан эрчим хүчийг хуваарилах зориулалттай байгууламж бөгөөд шинэ компани, шинэ орон тоо бий болгож байгаа асуудал биш гэдгийг тодотголоо.

Мөн Оюу толгой өөрийн хэрэгцээнд зориулан эрчим хүчний эх үүсвэр барих боломж бүрдэж байгаа бөгөөд үүнээс өмнө ийм боломж байгаагүй гэдгийг хэлэв.

Б.Найдалаагийн тайлбарласнаар эрчим хүч импортлох боломжийг бүрдүүлж байгаа нь зөвхөн импортыг нэмэгдүүлэх зорилготой биш, Монгол Улсын дотоодын эрчим хүчний асуудлыг шийдвэрлэх урт хугацааны бодлогын нэг хэсэг юм.

Түүнчлэн Монгол Улс цаашид эрчим хүчний асар их нөөц боломжоо ашиглан хөрш орнуудтайгаа хуваалцахын тулд экспортын бодлоготой байх шаардлагатай гэж үзэж байгаагаа илэрхийлэв.

Тэрбээр эрчим хүч экспортлох асуудал нь Монгол Улсын хувьд цоо шинэ ойлголт бөгөөд үүнийг хэрэгжүүлэхийн өмнө нарийвчилсан судалгаа хийх шаардлагатайг онцоллоо. Тухайлбал, аль чиглэлд экспортлох, ямар боломж байгаа, хууль эрх зүйн орчин ямар байх, ямар хүчин чадлаар хаана станц байгуулах, ямар эрчим хүчийг ямар шугамаар дамжуулах, ямар төслөөр хэрэгжүүлэх зэрэг асуудлыг судлах шаардлагатай байна гэв.

Энэ чиглэлийн судалгааг Шадар сайд хуульд заасан чиг үүргийнхээ хүрээнд хийж байгаа гэж Эрчим хүчний сайд Б.Найдалаа мэдээллээ.

Тэрбээр “Бид зөвхөн экспортлох гээд байгаа юм биш. Энэ бол дотоодын эрчим хүчний асуудлаа шийдэх урт хугацааны шийдэл. Цаашлаад асар их нөөцөө хөрш орнуудтайгаа хуваалцахын тулд экспортын бодлого зайлшгүй хэрэгтэй” хэмээн тайлбарлав.