УИХ-ын гишүүн, Ерөнхий сайд асан Л.Оюун-Эрдэнэ Ерөнхий сайд Н.Учралд хандан “өөрийн толгойтой байж, өөрийнхөө улс төрийг хий” гэж анхаарууллаа.

Тэрбээр “Н.Учрал хүний тавьсан занганд орж, бусдын гар хөл болж энэ нам, Засгийн газрыг удирдаж болохгүй. Өөрийн толгойгүй явбал хананд зургаа өлгүүлсэн Ерөнхий сайд л болно” хэмээн хэлэв.

Мөн Л.Оюун-Эрдэнэ өмнө нь Г.Занданшатарт хандан Б.Энхбаярын нөлөөнд орж болзошгүй талаар анхааруулж байсан бөгөөд “Г.Занданшатар Б.Энхбаяраар хөлөө боолгуулж унасан бол Н.Учрал хоолойгоо боолгуулж унах гэж байна” гэсэн байр суурийг илэрхийллээ.

Түүнчлэн хэдхэн хоногийн өмнө Ерөнхий сайд болон УИХ-ын даргатай уулзахад улс төрийн нөхцөл байдал хэвийн байсан ч сүүлийн хоёр хоногт огцом өөрчлөгдсөн нь хачирхалтай байгааг хэлсэн юм.

Тэрбээр Засгийн газар огцорсноор нөхцөл байдал сайжирна гэдэгт эргэлзэж байгаагаа мөн илэрхийлэв.