PISA-2025 үнэлгээнд Монгол Улсаас 191 сургуулийн 7,146 сурагч хамрагджээ. Энэ удаагийн үнэлгээний үндсэн чиглэл нь байгалийн ухаан байсан бөгөөд математик, унших чадварыг мөн үнэлсэн байна.

Унших чадвараар сурагчдын 33 хувь нь суурь түвшинд хүрчээ

PISA-гийн II түвшнийг суурь чадварын босго гэж үздэг. Монголын 15 настай сурагчдын 33 хувь нь унших чадвараар II түвшин болон түүнээс дээш гүйцэтгэлтэй байжээ. Энэ нь OECD-ийн 69 хувийн дунджаас 36 нэгжээр бага үзүүлэлт юм.

Математикийн хувьд сурагчдын 48 хувь, байгалийн ухааны хувьд 57 хувь нь II түвшин болон түүнээс дээш гүйцэтгэлтэй байна.

Байгалийн ухааны үзүүлэлт 12 оноогоор өсөв

Монголын сурагчдын байгалийн ухааны дундаж оноо 2022 онд 412 байсан бол 2025 онд 424 болж, 12 оноогоор өссөн байна. Харин математикийн оноо 425-аас 419, унших чадварын оноо 378-аас 374 болжээ.

Гэхдээ OECD-ийн тайланд математик болон унших чадварын онооны бууралт нь статистикийн хувьд ач холбогдол бүхий өөрчлөлт биш, харин байгалийн ухааны 12 онооны өсөлт статистикийн хувьд ач холбогдолтой гэж тэмдэглэсэн байна.

PISA нь сурагчдын мэдлэгийг цээжилсэн эсэхээс илүүтэйгээр сурсан зүйлээ бодит амьдралд ашиглах, асуудлыг шийдвэрлэх чадварыг үнэлдэг. Иймээс энэ удаагийн үр дүн Монголын сурагчдын уншиж ойлгох, мэдлэгээ хэрэглээнд шилжүүлэх чадварыг цаашид сайжруулах шаардлагатайг харуулж байна.