Хууль зүй, дотоод хэргийн сайд Г.Тэмүүлэн өнөөдөр /2026.10.27/ энэ талаар мэдээлэхдээ нотариатын үйлчилгээг цахимаар авах боломжийг бүрдүүлэх, зорилтот бүлгийн иргэдэд үнэ төлбөргүй үйлчлэх зохицуулалтын талаар танилцууллаа. Уг асуудлыг маргааш буюу Аравдугаар сарын 28-ны Засгийн газрын хуралдаанаар хэлэлцүүлэхээр төлөвлөжээ.

Нотариатын үйлчилгээг цахимаар авах боломж бүрдүүлнэ

Одоогийн нөхцөлд нотариатын зарим үйлчилгээг авахын тулд иргэн нотариатчийн ажлын байранд биечлэн очиж, шаардлагатай баримт бичгийг бүрдүүлэх шаардлагатай байдаг. Харин хуулийн шинэчлэлээр зайн гэрчлэлтийн эрх зүйн орчныг бий болгож, тодорхой төрлийн нотариатын үйлчилгээг цахимаар авах боломж бүрдүүлэхээр төлөвлөж байна.

Ингэснээр хуульд заасан шаардлагыг хангасан үйлчилгээг цахимаар авах, биечлэн очихтой холбоотой цаг хугацаа, зардлыг бууруулах боломжтой болно. Гэхдээ ямар төрлийн үйлчилгээг цахимаар авах, хэрхэн баталгаажуулах зэрэг нарийвчилсан зохицуулалт хуулийн төсөлд тусгагдана.

Зорилтот бүлгийн иргэдэд үнэ төлбөргүй үйлчилнэ

Нотариатын үйлчилгээний хүртээмжийг нэмэгдүүлэх хүрээнд ахмад настан, хөгжлийн бэрхшээлтэй болон төлбөрийн чадваргүй иргэдэд үнэ төлбөргүй үйлчлэх зохицуулалт тусгахаар төлөвлөжээ.

Энэ зохицуулалт хэрэгжсэнээр тухайн бүлгийн иргэд нотариатын үйлчилгээ авахад төлбөрийн хүндрэл учрах асуудлыг бууруулах зорилготой юм. Харин үнэ төлбөргүй үйлчлэх үйлчилгээний төрөл, хамрагдах нөхцөлийг хуулийн төсөл болон холбогдох журмаар тодорхой болгох шаардлагатай.

Нотариатын тухай хуульд нэмэлт, өөрчлөлт оруулах асуудлыг маргаашийн Засгийн газрын хуралдаанаар хэлэлцэхээр төлөвлөж байгаа бөгөөд цаашдын хэрэгжилт нь хэлэлцүүлгийн үр дүн, батлагдах зохицуулалтаас хамаарна.