Монгол Улс газрын тосны бүтээгдэхүүний хэрэглээгээ 100 хувь импортоор хангаж байгаа бөгөөд есдүгээр сарын 28-ны байдлаар нийт 357 мянган тонн шатахуун импортолсон байна. Үүнээс 157.3 мянган тонн нь АИ-92 автобензин, 188.5 мянган тонн нь дизель түлш, 11 мянган тонн нь онгоцны түлш аж.

Одоогоор улсын хэмжээнд АИ-92 автобензин 120.5 мянган тонн буюу 10 хоногийн нөөцтэй байна. Харин дизель түлш 85.6 мянган тонн буюу 21 хоног, онгоцны түлш 14.67 мянган тонн буюу 23 хоногийн нөөцтэй байгаа бол АИ-95 автобензиний нөөц 14 хоногийн хэмжээнд байна. Есдүгээр сарын 28-нд Улаанбаатарын 168 ШТС-д 1,848 тонн, орон нутгийн 78 ШТС-д 1,002 тонн АИ-92 автобензин нийлүүлжээ.

Мөн БНХАУ-аас 5,000 тонн АИ-92 импортолж, Замын-Үүдээр шилжүүлэн ачиж, дотоодын зах зээлд нийлүүлж эхэлсэн байна. Харин ОХУ-аас захиалсан 115 мянган тонн АИ-92 Монголын хилээр одоогоор орж ирээгүй бөгөөд ОХУ-ын үйлдвэр болон төмөр замд ачилт хийж байгаа аж. Түүнчлэн шатахуун тээвэрлэж буй вагон-цистерний эргэлт удааширч, Улаанбаатарын төмөр замд 1,200 орчим вагон байгаа нь нийлүүлэлтэд хүндрэл үүсгэж байна. Агуулахын нөөц бүрэн бүрдээгүй байгаа учраас төмөр замаар орж ирсэн шатахууныг буулгамагц ШТС-үүдэд шууд түгээж байна. Үүнээс шалтгаалан зарим шатахуун түгээх станцад түр хугацаанд тасалдал, дараалал үүсэж байгаа талаар шуурхай штабаас мэдээллээ.