Судалгаагаар хүүхдүүд шударга байдлыг хэрхэн ойлгодог, өдөр тутмын амьдралдаа ямар нөхцөлд шударга бус байдалтай тулгардаг талаар тодруулахыг зорьсон байна. Ингэхдээ хүүхдүүдийн санаа бодлыг эссэ, бичвэр, гар зураг, гэрэл зургаар илэрхийлүүлж, ганцаарчилсан болон фокус бүлгийн ярилцлагын аргыг ашиглажээ.

Судалгааны үр дүнг танилцуулах уулзалтад Хууль зүй, дотоод хэргийн яам, Боловсролын яам, Авлигатай тэмцэх газар, Хүүхэд, гэр бүлийн хөгжил, хамгааллын ерөнхий газар, Цагдаагийн ерөнхий газрын төлөөлөл болон бусад албан хаагч оролцсон байна.

Хүүхэд, гэр бүлийн хөгжил, хамгааллын ерөнхий газрын дарга Б.Баярсайхан судалгааны үр дүн, зөвлөмжид үндэслэн холбогдох байгууллагуудтай хамтран ажиллаж, шийдлүүдийг бодитой хэрэгжүүлэхэд анхаарна гэв. Мөн судалгааны үр дүнг Ерөнхий сайдын тэргүүлдэг Хүүхдийн төлөө үндэсний зөвлөлийн хуралд танилцуулахаар төлөвлөж байгааг мэдээллээ.