Нийслэлийн Засаг дарга бөгөөд Улаанбаатар хотын захирагч Б.Пүрэвдагва автомашины улсын дугаарын тэгш, сондгойгоор зорчуулсан өдрийн тоог ирэх оны зам ашигласны төлбөрөөс дүйцүүлэн хасаж тооцох саналыг НИТХ-д танилцуулсан. Ингэснээр долоо хоног бүрийн тогтмол дугаарын хязгаарлалтаас бусад өдөрт тэгш, сондгойгоор зорчуулсан хоногийн төлбөрийг хөнгөлөхөөр болжээ.

Төлбөрийн буцаан олголтыг тээврийн хэрэгслийн төрлөөс хамааруулан тооцох бөгөөд нэг хоногт 274-1,370 төгрөг, 14 хоногт 3,836-19,180 төгрөг, 30 хоногт 8,220-41,100 төгрөгийн хөнгөлөлт эдлэхээр тусгажээ.

Нийслэлийн хэмжээнд 744,246 тээврийн хэрэгсэл бүртгэлтэй байгаагаас 720,122 нь улсын дугаарын хязгаарлалтад хамрагддаг аж. Дугаарын тэгш, сондгойгоор зорчуулах зохицуулалтын хугацаанаас хамааран нийслэлийн төсвөөс нэг хоногт 300.8 сая, 14 хоногт 4.2 тэрбум, 30 хоногт 9 тэрбум төгрөгийг буцаан олгох тооцоо гарчээ.

Харин дипломат байгууллага, тусгай дуут болон гэрлэн дохио ашиглах зөвшөөрөлтэй, байлдааны болон тусгай зориулалтын, хөгжлийн бэрхшээлтэй хүний таних тэмдэг бүхий тээврийн хэрэгсэл, нийтийн тээвэр, хүүхэд болон ажилчдыг зохион байгуулалттайгаар тээвэрлэх автобус уг хөнгөлөлтөд хамрагдахгүй юм.